Per siu 75avel anniversari, ha la vischnaunca
da Laax regalau 1997 a Hans Moser ina senda
che porta siu num. 1966, suenter ch’el haveva
habitau entgins onns a Flem, ha il caricaturist
baghegiau ina casa sin quella spunda cun vesta
sur il vitg da Laax. Per siu 100avel anniversari
commemorescha la Fundaziun Pro Laax siu
convischin da renum naziunal.
«All’entschatta dev’ ei negin tgaun», ha Hans
Moser giu raquintau inagada en in artechel
cumparius ella gasetta regiunala «Arena Alva».
Per quella gasetta haveva el creau la figura dil
Closchi igl onn 1983. «Cura che Closchi ha
survegniu in tgaun, ei sia veta semidada, el ha
survegniu in amitg».
Moser spassegiava cun siu tgaun mintga di tras
Laax e la regiun maneivla e rimnava tut quei
che deva en egl ad el. Aschia raquenta era sia
figura Closchi enzatgei sur da sesez, fa patratgs
davart igl ambient, il turissem ed ils carstgauns
dalla regiun.
Moser ha remarcau biaras parallelas denter el
e sia figura dil Closchi: «Era jeu sun in individualist
e sai star star da miu persei. Era jeu hai
bugen la natira e beibel bugen ina gervosa».
Duront biars onns ei Hans Moser era s’engaschaus
a Laax per la protecziun dils amfibis, e
quei ei lu era stau il motiv ch’el ha survegniu il
surnum «Frosch Moser».
Circa amiez la senda sesanfla sia casa nua ch’el
ha viviu e luvrau. Da sia vesta ord igl atelier ha
el in gada detg: «Cheu ei il cor da Laax, ed en
quella regiun dat ei adina tematicas per mias
caricaturas.»
Suandei ils paliats mellens.
Avertura / Eröffnung 18.06.22Gasetta Museum Laax / Museumzeitung
rm / de
sut tschiel aviert
