Walk-In-Fotoshooting

Stefanie Blochwitz

Purtei «Vies» Moser

13.02.2022
Sentupada (sper baselgia), 13.00 - 16.00

Hans Moser – Caricaturist cun plema gita

Avon 100 onns, ils 13 da fevrer 1922, ei il caricaturist Hans Moser naschius a Neuhausen (SH). Naven dils onns 1960 ha el viviu e luvrau a Laax nua ch’ins seregorda uonn da siu vischin prominent ch’ei morts avon 10 onns.

In comite d’organisaziun cun representants dalla vischnaunca, dalla fundaziun Pro Laax, dil Museum, dalla Cularta, d’amitgas ed amitgs da Hans Moser ha priu l’iniziativa e preparau in program cun ideas ch’ins less realisar el decuors digl onn giubilar. Punct da partenza per presentar alla publicitad la lavur da Hans Moser, ei siu relasch persunal ch’el ha surdau alla Fundaziun Pro Laax. Ussa ei il mument arrivaus per sefatschentar en detagl cun quei archiv, sistematisar igl inventari ed empruar da cumplettar quel cun tut quei ch’el ha fatg el decuors da sia liunga veta.


Duront decennis fa Hans Moser numerusas caricaturas humoristicas per la revista satirica «Nebelspalter». In grond public contonscha el cun la figura dil «Herr Schüüch» ch’el ha creau per quella revista. Naven da 1963 viva Hans Moser cun sia famiglia a Laax. El ei era staus activs sco columnist, ha scret artechels ed historias cuortas. En moda critica tractan ses dessegns savens era la destrucziun digl ambient e nossa relaziun cun animals. Per quei engaschament eis el vegnius undraus 1990 cun il premi da renconuschientscha Binding, in premi che vegn surdaus per engaschament special per la natira e la protecziun digl ambient.

El decuors da sia carriera ha Hans Moser survegniu numerusas autras distincziuns per sia lavur sco cartoonist e caricaturist. Aschia per exempel la medaglia d’aur dalla 2. Biennale dell'Umorismo nell'Arte a Tolentino, Italia, 1963, la medaglia d’aur per il sboz d’ina marca postala al Salone Internazionale del Francobollo a Torino, Italia, 1969, il premi special dalla gasetta «Nova Makedonja» a caschun dalla Galerie mondiale de la caricature a Skopje, Macedonia, 1970, la palma d’aur a caschun dalla 28. exposiziun internaziunala a Bordighera, Italia, 1975, ed il Türler Pressepreis, 1986.

Purtei «Vies» Moser
Aunc schi bugen havessen ils organisaturs dau l’entschatta agl onn giubilar cun ina sentupada a caschun da siu di da naschientscha, e fatg in viva sin Hans Moser, raquintau e brattau reminiscenzas ed experientschas.
Deplorablamein lubescha la situaziun actuala da corona buca in inscunter pli grond.
El decuors da sia veta ha Hans Moser realisau biaras lavurs sin giavisch. Dessegns e carricaturas per eveniments da tut gener che pendan ussa en stivas privatas.

Quellas lavurs vulein nus documentar e nudar egl inventari da siu relasch.

Il di da siu 100avel anniversari, dumengia, ils 13 da fevrer 2022, vegn perquei installau ella «Sentupada» (sper la baselgia) a Laax in studio da fotografia.
Dallas 13.00-16.00 ha liug in Walk-in-Fotoshooting. Visitaders san purtar lur ovras caricaturas etc. da Hans Moser. Quellas vegnan – ensemen cun ils possessurs – fotografadas e documentadas. Silsuenter vegnan las fotos plazzadas sin la pagina d’internet dalla fundaziun Pro Laax, ella Cularta, el Museum e sin las plattafuormas creadas aposta per igl onn giubilar.
Per planisar igl urari supplichein da s’annunziar: info@cularta.ch ni 078 635 96 65.
La fotografa Stefanie Blochwitz fa il shooting e vus survegnis la foto digitala per vies diever.

Bugen saveis era tarmetter ina foto ed informaziuns da «vies» Hans Moser sin l’adressa dad e-mail menziunada sura.

Formular PDF: Einwilligungserklärung zur Veröffentlichung von Fotos DE RM
Werke online bei Cyranos
100 Jahre Hans Moser (Pro Laax)